«Торама» фолк-группась—«Поле чудес» капитал шоуса!
Ламотне эздонк кельгсазь «Васенце канал» общероссийскяй федеральнай каналса «Поле чудес» капитал шоуть, кона лисенди эрь пяденцяня илять, ванондоманц. Тняра кизоста (программать эфироц васенцеда няфтьфоль 1 каналса 1990 кизонь 26 октябрьста) барабанть аф весть шарфнезь и минь земляконьке.
Аф кунара, пяденцяста, 23 октябрьста, «Васенце каналонь» инь содаф передачатнень эзда фкаса участия примась Мордовияста «Торама» фольклорнай ансамбльсь.
Ансамбльть директоронц А.А.Николаевонь валонзон коряс, артисттне тертьфтольхть «Поле чудес» передачати сентябрьста, эста и содазь, што коллективть лангс тяшка оцю мяль шарфтфоль аф стак. Тяддень майста «Торамась» арась «Музыка Победы» международнай онлайн-марафононь участникокс. Марафонць ётафтфоль Великай Отечественнай войнаса Победать 75 кизонь топодеманц мяльса кирдезь. Тя проектти руководителькс ульсь Российскяй Федерациянь Народнай артистсь, «Поле чудес» передачать вятиец Л.А.Якубович.
«Музыка Победы» онлайн-марафонца участия примась 12456 ломань Россиянь, маластонь и ичкоздень омба масторонь 360 ошнень эзда. Ёткстост проектть организаторонза шарфтсть башка мяль «Торама» ансамбльть артистонзон асуснон и эсь лацонь ширеснон лангс. Синь и тердезь творческяй тя коллективть инжикс «Поле чудес» передачати. Тяда башка, барабанонь шарфтома якась Саранск ошень эряйсь Татьяна Дувакина.
Капитал шоути съёмкатнень тиемста фольклорнай коллективть участниконза лятфтазь, што тядде Леонид Аркадьевич Якубовичень 75 кизонь юбилеец. И седи ваксста поздравляндазь сонь мороса. Но тянь лангс тевсь ашезь лотка! Поздравляндамань валхне, морось ётасть эсь лацонь концертокс, конань пингста Л.А.Якубович маштозь нолязе тевс эрзянь музыкальнай инструментть—люлямать.
Ведущайть мяльс пяк тусть мокшэрзянь фольклорсь, «Торамать» участниконзон национальнай щамсна-карямсна, музыкальнай инструменттне. Леонид Аркадьевич мярьгсь ансамбльти морамс аф аньцек передачать пингста, но и няфтемс асушинц капитал шоуть участниконзонды программать песта. Тяфта и тифоль. Передачать пингста «Торамась» моразе «Ёру» мороть, конань кочказь «Поле чудес» капитал шоуть продюсеронза, а шумордамста морасть съёмочнай группати, Л.А.Якубовиченди и съёмкать участниконзонды.
Мокшэрзянь колорит мархта—тяфта кенерсть ни лемдемс кой-кит «Поле чудес» капитал шоуть тя выпусконц, няеськ 23 октябрьста. Но несколька кизода инголе «Торама» фолк-группась ульсь ни тя передачаса, коса содафтсь Л.А.Якубовичень мархта и тиезе сонь «почётнай мордвинкс».
«Мокшень правда», Татьяна Альшина.